1398. September 23. Czarnowanz

In Nomine Domini Amen. Anno a Nativitate eiusdem Millesimo Trecentesimo Nonagesimo octavo, Vicesima tercia die mensis Septembris, Hora quasi nona in Monasterio Sanctimonialium Monasterii Domusdei alias Czarnowans Ord. Prem. Wrat. Dyoc. Pontificatus Sanctissimi in Cristo patris et domini nostri domini Bonifacii divina providencia pape noni Anno nono, In mei Notarii Publici et testium subscriptorum presencia ad hoc Vocatorum et Rogatorum personaliter constituti Honorabilis et Religiose Virgines, dominus Nicolaus Prepositus, Agnes Swyrczowna Priorissa, Bronka Subpriorissa, Agnes Circatrix, Elizabeth Custrix, Anna Cantrix, Eufemia Succentrix, Margaretha celleraria, Boguschca, Barbara, Heszka, Elizabeth Ogonek, Katherina, Dorothea, Netha Pnowna, Margaretha Baruth, ad sonum campanule nomine tocius conventus congregate ipsorum Monasterii predicti Domusdei, fecerunt constituerunt et prout melius potuerunt ordinaverunt, Honorabilem virum dominum Maternum Wygandi de Hildenbrendisdorff, prepositum Ecclesie Falkinbergensis dicte Wrat. dyoc. ad comparendum pro eis et ipsorum nominibus in Romana Curia in audiencia publica litterarum contradictoriarum prefati domini nostri pape contra quascunque personas ecclesiasticas seculares vel regulares, litteras tam simplices quam legendas graciam vel iusticiam continentes impetrandum obtinendum impetrandas, ex adverso contradicendum et inpugnandum, loca et Iudices eligendum et recusandum et in eis consenciendum et conveniendum, cauciones et satisfacciones dandum petendum et recipiendum et super hiis in animam ipsorum Constituencium prestandum quodlibet licitum iuramentum in talibus prestari consuetum, protestaciones quascunque in premissis necessarias et oportunas faciendum, unum quoque vel plures procuratores loco sui substituendum cum totali potestate, Et generaliter omnia alia et singula dicendum et faciendum que in premissis et circa ea secundum stilum dicte Romane Curie fuerint quomodolibet oportuna, et que veri procuratores ad talia constituti facere possunt et debent et que eciam ipsi constituentes dicere et facere possent si presentes interessent, Et relevantes dictum suum procuratorem et substitutos ab eo et eorum quemlibet ab omni satisdacionis onere promiserunt michi Notario Publico infrascripto tam quam publice persone stipulanti et recipienti vice et nominibus omnium et singulorum quorum interest vel interesse poterit in futurum, rata grata et accepta habere et tenere omnia gesta et facta ac procurata per dictum ipsorum procuratorem et substitutos ab eo, et pro eis et quolibet eorum iudicio sisti et iudicatum solvi cum suis clausulis universis, sub suorum omnium ypotheca et obligacione bonorum. De quibus dicti constituentes pecierunt sibi fieri publicum Instrumentum a me Notario infrascripto. Acta sunt hec anno, die, mense, hora, loco, pontificatu quibus supra, Indicione sexta, Presentibus discretis et Religiosis viris dominis Jacobo priore, Johanne Hawenschilt fratribus, Wenceslao capellano, Johanne Oeker organista, Laurencio familiari, dicti Monasterii Domusdei, testibus ad premissa vocatis specialiter et rogatis.
Et ego Petrus Schorgast olim Jeschconis presbiter etc.

Aus dem Archiv von S. Vincenz.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.